الشعر شارد فالجبل منى
عملت أنا هجان و رحت وراه
قلبى دليلى يطير و يغنى
عصفور جناحه بدمه متحنى
لففنى لففنى الجبل و لا تاه
تسفى الرياح سبعين صباح و صباح
قلبى دليلى و أنا وراه سواح
و الشعر شارد فى الجبل منى
حبيت غزال غنيت له بالموال
صد الغزال ساق الدلال أهوال
حبيت غزال غنيت له غنيوه
صد الغزال علشان ما هو حليوه
غنيت له رصد
هجر بقصد
غنيت صَبَا
جافى و نَبا
غنيت له بياتى
رقاص أنا شاعر و ناياتى
وافدى رفاق الفن بحياتى
وافديك يانجم أخضر يا بياتى
أفديك أنا
يا عندليب ع المشنقة عشه
عافر مع الجلاد قام هشه
علشان يروق الجو لفعاله
يقتل و يعمل كل ما بداله
يهبش في ورد الحب و يحشه
صوتك من البلد البعيد جاله
عدى من الحراس و عداله
و كأن يد الرب نازلا له
تكشف نقاب الغش عن وشه
أفديك أنا
يا عندليب ع المشنقه عشه
خارج يوم العيد و قلبى سعيد
شفت البنات يتعجبوا فى الألوان
و كأنهم أغانيك يا بياتى
يا بو الاغانى الزرقا و الخضرا
و كأن حلمك بان وآن له أوان
مديت خيالى للعراق ..البعيد
لابنك "على" وهاديته بالونه
كاتب عليها جميع حكاياتى
كان ياما كان
ملك الزمان
كان ياما كان
ظلم و هوان
إنسان جعان
كان ياما كان
وكأن حلمك بان وآن له اوان
الغنوة زرقا و الكلام بجناح
فتحت أنا للشمس شباكى
على قاعدة الشباك أنا تاكى
بين شفتى و صوابعى صباح و صباح
تسفى الرياح سبعين صباح و صباح
قلبى دليلى و أنا وراه سواح
و الشعر شارد في الجبل منى
الإثنين أبريل 21, 2008 5:45 pm