يا بخت من يقدر يقول
واللى ف ضميره يطلعه
يا بخت من يقدر يفضفض بالكلام
و كل واحد يسمعه
يقف في وسط الناس و يصرخ آه يا ناس
ولا ملام
ييجى الطبيب يحكى له ع اللى بيوجعه
يكشف مكان الجرح و يحط الدوا
و لو انكوى
يقدر ينوح
و انا اللى مليان بالجروح
ما اقدرش اقول
ما قدرش ابوح
والسهم يسكن صدرى ما اقدرش انزعه
شوفى قد ايه؟
احنا النهارده ايه فى ايام السنة
شتا ولا صيف
و فين انا؟
ايه اللى وصلنى هنا؟
انا صاحب البيت ولا الضيف؟
صوتى انحبس
ما اقدرش اقول
ما عرفش حاجة عشان اقول
ما عرفش غيرك انت بس
يا بت ياللى ف حبك العقل اتهوس
مكان غريب
كأنه سجن كأنه مخدع لحبيب
كأنه بير
شباك حديد و عليه ستاير من حرير
والريح بينفد منه زى المسامير
الريح عوى
قلبى انقبض
قلبه تلوى
الشمس تلج اصفر شعاعها صاروخ هوا
الضلمة تلج اسود كتير
ألوف ألوف القناطير
خبينى في شعورك يا بت
أحسن عروقى اتخشبت
شعرك خشن زى الحِرَام الصوف يا بت
خبينى فيه م الزمهرير
و نيمينى في السرير
الإثنين أبريل 07, 2008 11:45 pm
