منين اجيب مقص مجنون زى بس نص نص
و أجيب ورق و فضل أقص أقص أقص
أفضل أقصقص ورد على كل لون
لحد ما أعمل عندى حبه كتير كتير
و أركب لى نسمه و أطير أطير
و أحفن و أدردب ع البلاد
مطر غزير
ينزل يرخ يرخ , على قرعه بنات أخت البشر
يتسبسبوا, و يتشيكوا
و يبقوا لبسين لا مؤاخذه طراطير
و يا سلام .. لو كان معايا و قتيها قلم كوبيا, طويل طويل طويل
أبله من قلبى , اللى عرقان م السفر
و أكتب به و أنا طاير , على خد القمر
أنا بحبك يا جميل
***
قصاقيص ورق
لكن مطر
يرخ جامد , قد ما يحبوا الولاد
يا دوب كده
مقدار ما يجروا , و يمسكوا
مطر... خطر
ينزل على كتاف العجايز... يضحكوا
يشبك فى سلك تليفون
هنا وهنا وهنا وهنا
على كل لون
واللى فى جنازته في التابوت , يفوت , يبص
يلاقى عالم , كله كله كله زينه عيد ميلاد
و يبقى فصل , لكن مفيش بالشكل ده
لابد من عيد الميلاد
أنا عيد ميلادى ما لوش معاد
فين الورق و النسمه و المقص و القلم يا واد
ولا بلاش ده مفيش أمل
أعياد كتير بيبتدوا و بيفرغوا
و بيفضل العالم كده
مكبوس و دمه تقيل تقيل
يا ربنا
ياللى خلقت لنا الأيادى للهزار و العمل
أدينى قوة ألف مليون إيد
عشان أزغزغه
الإثنين أبريل 21, 2008 1:09 am